Rom 10 | ASO | STEP | Neze zuhokizo, naza Zuda vemu' nene lu'neu' amuzo molo gelaa' nouvoni' nene ado' ti' lo gelo O'mosola a'minemu' laa' nouve: O'moso'mo do ngu' izeliho lo a'minemukovo' laa' nouve.

Romans 10

1 Neze zuhokizo, naza Zuda vemu' nene lu'neu' amuzo molo gelaa' nouvoni' nene ado' ti' lo gelo O'mosola a'minemu' laa' nouve: O'moso'mo do ngu' izeliho lo a'minemukovo' laa' nouve. 2 Nene nanitekumu' ve. Engi' monovo nene mo ninge lamine' o nouve. Ingine nene gilingili igi O'mosomu' gilaa' nani'za eze e'metilizani' aka nene ninge nobe li ningi gili guni amave. 3 Ido' ne'mine noluvoni' nene nemu' noluve: Ingine O'moso'mo evenekumu' evene' lisihe' ve lo-ngedaa' neine' monovomu' nene gili imami mini angise'ine di soto' ani' monovolo' di mili evene' lisihe' ilisa igi mili minaa' nani'za O'moso'mo evene' lisihe' ve lo-ngedeline' monovolo' nene gelekele' amave. 4 Ne'mine iga' nani'za ezemu' gili ele'vole' igi minave nene ve lisihe' ve lo-ngedosa Kilisito' aza lou' gamazilo' e'metaatoti' evene' lisihe' lolo' oga' aka nene mo mudise hize tiline' nenako nemu' ingine nene mo ladani nave.

Guvelesi Vela Vise Liliza Aleve Muki' Nene Do nGu' Izeleseive Lo Paulo' Line' Gamazi

5 Naza mo lamineto' noluve. Ingine ngelo amoso' inite' ilisa nani' neine' nene Mose' aza lou' e'metaatoti' evene' lisihe' lolo' ogakumu' ti' lo gizidoti' nene ha gelelesune:

Ve ma ingine a'mine lou' gamazi vaito' e'meti lamine' ma ilizani' nene a'mine ne'mine ilizadoti' nene mine lamine' igi ha minivi' minivi' igi minilisave.
6 Ne neiha O'mosomu' gele ele'vole' ogatotikovo' nene evene' lisihe' lolo' oga' neve nene lapa nomivo ha lolo' olonido' neine' nene gamazi ma ti' lo neidoti' nene gelelesune:

Lingine a'mine nene mo amoso' nite' neive lisa lutingu' ti' li gilamilo: Okulumokuko zaho dizelive. Mo ma dizamilisave. Ido' home galese golosou' zaho lemelive. Mo ma limamilisave.
Ne'mine lilizani' nene Kilisito'ni Okulumokukoti' ele'mizi limilizangumukisi ido' hilinguti' di oti-di ele'mizi dizilizangumukisi lilizani' nenako ido' Kilisito' aza mo Okulumokuti' lemosa hilinguti' nene mo otosa neine' nenako nemu' nene amoso' inite' ma nomine' nenako ne'mine li gililizado' ma nomive lo neine' ma neive. 8 Ne neiha a'minemu' nene gamazi ma ti' lo neive:

A'mine mono' gamazi nene hota ne'mine ma minamive.
Asi avito' mino
lingine ha vetinedunu' lilizado' mino lutingu' gililizado' neive.
A'mine mono' gamazi nene O'mosomu' gele ele'vole' ogali'mi gamazi leli' lo soto' o ngemaa' noune' gamazi nene neive. 9 Ado' lingine vetinedunu' nene Izesu' aza Guvetesi ve naba ve li li soto' igi ido' lutingu' nene O'moso'mo hilinguti' do ote-dine' ve li gili ele'vole' ilizani' nene O'moso'mo do lungu' izeleseive. 10 Ee, lutedunu' a'mine gamazi gele ele'vole' oso' nene O'moso'mo evene' lisihe' ve lo-ledelive. Ido' vetedunu' a'minemu' lo soto soto' oso' nene O'moso'mo do lu' izeleseive. 11 Ido' mene noluvoni' nene mono' godolou' ti' li gizi nizado' nene vo milise' ogave:

A'mine vemu' gili ele'vole' ilizave muki' nene
a'mine gili ele'vole' ilizadoti' nene gihile've dami ngovozo hililizavoba
asi hilamilisave.
12 Ido' ingine muki' ngovozo hilamilisave noluvoni' nene Zuda vesi heta ato' vesi nene ato atoli'mine minamavo engi' sitato' gizebo oga' ive nene Guvelesi ve ei' hamokovo' mino hize ele' o-ledelive li ezela laa' nave ato ato' muki' nene atoli'mine ogo nasahili' o-ngedaa' neine' nenako nemu' nene noluve. 13 Ee, evene' muki' ingine Guvelesi ve'mi gulive igi ezela lilizave ato ato' muki' nene do ngu' izeleseive li mono' godolou' gizi nizani' ve.

14 Ne'mino neine'za ingine Kilisito'nimu' gili ele'vole' amani' nenako nadiisa ei' gulive igi ezela lilizave. Mo ne'mine ma amilisave. Ido' ezemu' li-ngimavo ma gilamani' nenako haza nene nadiisa gili ele'vole' ilizave. Mo ngeli ne'mine ma amilisave. 15 Ido' O'moso'mo eze gamazi li soto' igi li-ngimilizave ma ngimiselamiline' nene nadiisa vi li soto' igi li-ngimilizave. Mo ne'mine ma amilisave. Gamazi lamine' li-ngimilizave ngimiselingumu' nene mono' godolou' ti' li gizi nizave:

Gamazi lamine' li soto' igi li-limilizave ani' nene mo ede vine' inite' ikeve lo lolize izekune.
Gamazi lamine' li soto' ilizave nene mo ne'mino ngimiselavo igi li soto soto' ani'za 16 Isilaele' aleve muki' gidini nete a'mine gamazi lamineto' nene gili damani' ve. Ne'mine ani' nene mono' godolou' polohete Isaia' gamazi ma ti' lo lido' nene vo dani' ve:

Guvekasi ve, laza lo-ngimune' gamazilo' nene
mo ma gili ele'vole' amave.
17 Nemu' nene laza ti' lo gele none: Kilisito'nimu' gele ele'vole' olone' nene gamazi lamine' gelosavo' nene gele ele'vole' olosune. Ido' gamazi lamine' gelelone' nene Kilisito' gamazi've nelotikovo' nene gamazi lamine' gelelesune. 18 Ne'mino neine'za naza ti' lo noluve: Ingine nene a'mine gamazi mene gilamavoba asi mo gili nizave. Mono' godolou' ti' li gizi nizani' malo' vo dave:

Ve'ninguti' gamazi ne'mo nene mo misubou' misubou' vo osu' lave.
Ee, gamazi'ine nene evene' minani' misubo ne'mo vo sididasi nene
buu lo vine' ma neive.
19 Ido' naza gohi ti' lo noluve: Isilaele' aleve ingine gili vevesamilizado' minavoba asi gili vevesilizado' minani' ve. A'mine nemu' nene gana' Mose' O'moso'mo line' gamazi ti' lo gizine' ve:

Evene' ma neni' zuho nizave li gilamave haza ve engikuti' nene
ma do nenita okuvo
lingine Isilaele' aleve a'minemu' nene lavodine nalisave.
Ee, ga'ine gili vevesamave nene ma do nenita okuvo
nemu' nene mo lingizebolo' molaloseive.
20 Ido' Isaia' aza O'moso'mo line' gamazi gohi ma lovo' kiselevo' ogo ti' lo gizine' ve:

Nenikumu' vise' isa'mave nete nene nenikumu' mo ningi gilikeve.
Ee, neni' monovo'nemu' gililisa longo' isa'mavela nene
neni' monovo'ne do soto' ogo ngelebizekuvo
mo ningikeve.
21 Ne neiha Isilaele' alevemu' aza ti' lo line' ve:

Naza nene haza minamo
gamene gamene a'ne do patelo nenita alo alo lo-ngede'mo vovo' minaa' nouvoni'za
ingine nene gamazi'ne gili huli e'menga laa' ave mini
mo gilisa'mave.